Ek Aur Kaala MangalWaar

February ke Pahle hi din Ek sath kayi buri khabrein sun-ne ko mili, jinhe sun kar dil aahat ho gaya..
Subah se Kahira me Janta ka Vidhroh khabro me aa raha tha to shaam hone tak Apne U.P. me Bareilly Indian Tibbet Police me bharti ho kar desh ki raksha karne aaye laakho Berojgaaro me se ek darjan se adhik ke Train ke upar baithkar safar karne ke dauraan Shahjahaanpur me Hathoda Pull par us Bridge se takrane se huye dardnaak ant ko sun kar dil ro pada.. aur us par desh ke Grih Mantri ke ye bayaan ki U.P. Govt. ki galti se ye haadsa hua, dil ko aur aahat kar gaya.. ek dusre par aarop lagaane ke liye to in sab netaaon ke paas time hai magar kisi ke dukh dard ko sun-ne samajhne ke liye ya unki samasya door karne ke liye kisi ke paas waqt nahi hai..
Kitna achha hota ki Chidambaram ji ye kahte ki wo is haadse se dukhi hain aur aage is tarah ki ghatnaye na ho iske liye wo sabhi rajya sarkaro ko sahi nirdesh denge, naye kaanoon bana kar is tarah ki ghatnao ko rokne ka prayaas kiya jayega, Railway me is tarah ki pariksha hone par pahle se hi Special Trains chalayi jayengi taaki jyada bheed hone se afraa tafree ka mahaul na bann paye..
Magar afsos ki aisa kuchh bhi kisi bhi Neta ke muh se nahi sunayi diya..
kya hoga aage? 4-5 lakh Mare huye Ladko ke gharwalo ko de diya jayega aur gambheer roop se ghayal logo ko 1-2 Lakh de kar Zunzuna pakda diya jayega..
jane us15-20 ladko me se aise kitne yuvak desh ki raksha karte huye shadeed ho jate par unke naseeb me apne desh me is tarah se marna hi likha tha..
unki Laashen jab Train ki chhat se neeche fenki ja rahi thi to aisa lag raha tha ki Kapde ki koi Potli neeche patki ja rahi ho.. Dil dukh gaya aisi khabar dekh kar..
Khatre me hai Jaan, Fir Bhi Apna Desh Mahaan..!!
Ye Khabar dekh hi raha tha ki neeche Flash me Kanpur ke Panki me Maalgaadi
se ek Tata Magic aur Byke ke takraane ki News dikhayi di, Pata chala ki yaha bhi ek haadsa ho gaya hai..
Bina kisi Surksha ke upaaye ke is tarah se Train Bazaar wale din Nikali jayegi to is tarah ki ghatnaaye to hongi hi, iski aashanka mujhe pahle se hi thi, par yaha sun-ne wala kaun hai?
Ye haadsha Power House Plant ke andar koyle ki 55-60 bogiyon wali maalgadi ki shunting ke dauraan huyi, aur aksar yaha par Train us din hi aati hai jis din bheedbhaad jyada hota hai -- yaani baazaar wale din..
Kya ye Train Raat me andar nahi layi ja sakti thi? ya inko tabhi laana jaruri hi tha to 2-4 aadmi laga kar traffic nahi rok sakte the? sari suvidhayen hain yaha par fir bhi laaparwahi sa maahaul bana rahta hai..
Khud ki jaan bacha kar chalo, Saamne wala kab thok ke nikal jaye koi Bharosha nahi hai aajkal..
Mujhe hi le lijiye, achha khasa office se chala aa raha tha ghar, 40-45 ki speed hogi Byke ki, OneWay raasta tha, fir bhi achanak dusri taraf se ek 13-14 saal ke bachhe ne kafi tez cycle se aate huye achanak mod ke bhed diya.. Beech me Divider tha aur usme lagaye gaye ped paudhe itne ghane the ki dusri taraf se koi aata hua dikhta bhi nahi..
 use bachane ke chakkar me mujhe 3 mahine bistar par hi rahna pada.. aaj tak pair ke zakhm thik nahi huye, chehre par zakhmo ke daar alar se de gaya..
Kya is tarah ki ghatnaye ab aur jyada hi hongi?
inhe rokne ke liye koi upaay nahi kiya jayega?
Yahi hai ki bas jiye ja rahe hain..
Zindgi Zeher ban chuki hai
Fir bhi Piye ja rahe hain..!!

Shayad wo subah kabhi aaye jiske intezar me hum sabhi hain..
aakhir
WO SUBAH KABHI TO AAYEGI..!!

Please post ur Comments